«Amul-Hazar 2018» halkara awtorallisine bagyşlanan maslahat

2018-nji ýylyň 31-nji awgustynda Aşgabatda, Olimpiýa şäherjiginiň «Sport» myhmanhanasynda «Amul-Hazar 2018» halkara awtorallisine bagyşlanan maslahat geçirildi.

Bu çärä ýurdumyzyň ýolbaşçy düzüminiň agzalary, ministrlikleriň we edaralaryň işgärleri, «Amul-Hazar 2018» halkara awtorallisine taýýarlyk görmek we ony geçirmek boýunça jogäpkär wekiller, köpçülikleýin habar beriş serişdeleriniň, jemgyýetçilik guramalarynyň işgärleri, ýokary okuw mekdepleriniň mugallymlary we talyp ýaşlar gatnaşdylar.

Türkmenistanyň Ministrler Kabinetiniň 31-nji awgustda geçirilen mejlisinde Türkmenistanyň IIM-niň ýolbaşçysy döwlet ýolbaşçysy Gurbanguly Berdimuhamedowa sürüjilik şahadatnamasyny we sport awtomobiliniň tehniki paspotyny gowşurdy.

Ýurdumyzyň Içeri işler ministrliginiň Sport ulag merkeziniň we Awtomobil sporty boýunça milli federasiýasynyň toparlarynyň 15-si bu ýaryşda ýurdumyza wekilçilik eder. Olar şu ýylyň maý aýynda guralan saýlama tapgyry geçdiler.

Maslahatda çykyş edenleriň belleýişleri ýaly, häzirki döwürde ýaryşlaryň guramaçylyk-tehniki üpjünçiligi babatda bolşy ýaly, ýurdumyzyň sport mümkinçiliklerini berkitmek, bu ulgamda halkara gatnaşyklaryny ösdürmek ugrunda giň möçberli taýýarlyk işleri alnyp barylýar. Bu ugur boýunça belli hünärmenler, şeýle çärelere gatnaşmakda özüni görkezen kompaniýalar bilen özara gatnaşyklar alnyp barylýar.

Maslahata gatnaşyjylaryň çykyşlaryndan soňra Türkmenistanyň ýygyndy toparlarynyň agzalaryna degişli şahadatnamalar we hormatly Prezidentimiz Gurbanguly Berdimuhamedowyň adyndan türgenleriň ýörite sport lybaslarynyň toplumy gowşuryldy.